12.03.2025
У 2025 годзе Беларусь старшынюе ў органах Еўразійскага эканамічнага саюза, цэнтральным экспанентам выставы-кірмашу на гэты раз стаў аб'яднаны стэнд краін — удзельніц ЕАЭС, дзе прадстаўлена інтэрактыўная экспазіцыя. Кожная з краін у складзе саюза мае асобны дзень для прэзентацыі культурных і літаратурных традыцый. Акрамя таго, адной з ключавых тэм XXXII Мінскай міжнароднай кніжнай выстаўкі-кірмашу стала 80-годдзе Перамогі савецкага народа ў Вялікай Айчыннай вайне.
12 сакавіка ў рамках выставы адбылася дыялогавая пляцоўка "Укараненне вучэбна-метадычнага комплексу па духоўна-маральнаму і патрыятычнаму выхаванню". Да ўдзельнікаў сустрэчы звярнуўся старшыня Сінадальнага аддзела Беларускай Праваслаўнай Царквы па супрацоўніцтве са свецкімі ўстановамі адукацыі, протаіерэй Фёдар Поўны: «…Вельмі важна, што факультатыў прапануе чытаць, думаць, абмяркоўваць, прайграваць сюжэты. Напрыклад, тэма міласэрнасці і служэння адкрываецца з розных бакоў. Адзін з аспектаў - служэнне Хрыста людзям і чалавека Богу і блізкаму. Паказваецца, якія духоўныя выявы і сюжэты Евангелля, літаратуры адлюстроўваюць гэтую тэму, як яна раскрытая ў мастацтве, якія народныя звычаі з ёй звязаны. А далей бярэм фокус служэння чалавека грамадству. Расказваем пра подзвіг сясцёр міласэрнасці і медыцынскіх сясцёр на фронце, прапануем для вывучэння біяграфію Зінаіды Тусналобавай, якая, ратуючы ў гады Вялікай Айчыннай вайны параненых, пазбавілася рук і ног, але дух яе не быў зламаны, яна пражыла паўнацэннае жыццё. Знаёмім з дзейнасцю Беларускага Чырвонага Крыжа, сацыяльнай дзейнасцю манастыроў і парафій Беларусі. І гэта толькі адзін прыклад. Хачу адзначыць, што кожны навучальны дапаможнік факультатыва — гэта, па сутнасці, вучэбна-метадычны комплекс. Ён аб'ядноўвае ў сабе падручнік, працоўны сшытак і ілюстраваны слоўнік. І ад нашых беларускіх педагогаў, і ад калег з іншых краін мы атрымліваем шмат добрых водгукаў. Зацікавіліся гэтым вопытам таксама ў Санкт-Пецярбургу. У Дзень Рэспублікі Казахстан прайшла прэзентацыя культурнага і турыстычнага патэнцыялу Казахстана і вялікая літаратурная сустрэча "Казахстан - Беларусь: Мерыдыяны дружбы". Міжнародны квартал адкрыецца на выставе 13 сакавіка. У ім будуць удзельнічаць каля 20 дыпламатычных місій, акрэдытаваных у Беларусі, замежныя выдавецтвы і аўтары. Таксама ў гэты дзень Пасольства Кыргызскай Рэспублікі сумесна з Саюзам пісьменнікаў Беларусі правядзе вялікую прэзентацыю, прысвечаную творчасці Чынгіза Айтматава і сумесным выдавецкім праектам. Расійская кніжная галіна апынецца ў цэнтры ўвагі 14 сакавіка. У гэты дзень у Менск прыбудзе кніжны цягнік з расейскімі публіцыстамі і літаратарамі. У рамках выставы сустрэчы з чытачамі правядуць Алег Рой, Дзмітрый Емец і Ася Лаўрыновіч. На расійскім стэндзе і галоўнай сцэне кірмашу пройдуць выступленні творчых калектываў, музыкантаў і паэтаў з Башкартастана, Дагестана, Татарстана і Чачні. У Дзень Рэспублікі Беларусь, які прыпадае на дзяржаўнае свята - Дзень Канстытуцыі, айчынныя міністэрствы і выдавецтвы прэзентуюць знакавыя выданні "Сімвалы суверэннай Беларусі", "Дзяржаўнасць Беларусі: даты, факты, падзеі" і "Інстытут Прэзідэнцкай улады - умацаванне беларускай дзяржаўнасці", "Зыходны код", і іншыя. Таксама ў суботу, 15 сакавіка, пройдзе ўрачыстая цырымонія ўзнагароджання пераможцаў 64-га Нацыянальнага конкурсу "Мастацтва кнігі". Чараду тэматычных дзён выставы завершыць прэзентацыя Рэспублікі Арменія, якую арганізуе фальклорны ансамбль "Эрэбуні". Упершыню на форуме прадставяць калектыўныя рэгіянальныя стэнды выдавецтваў, друкарняў, бібліятэк і абласных аддзяленняў Саюза пісьменнікаў Беларусі. Яшчэ адной важнай кропкай прыцягнення наведвальнікаў выставы стане адукацыйны квартал, дзе можна будзе азнаёміцца і набыць навучальную, адукацыйную і асветніцкую літаратуру.
Па матэрыялах Агенцтва "Мінск-Навіны"
