9 мая 2025 года, у 80-ю гадавіну з Дня Перамогі ў Вялікай Айчыннай вайне, Патрыяршы экзарх усяе Беларусі мітрапаліт Мінскі і Заслаўскі Веніямін здзейсніў Боскую літургію ў Крыпце Нацыянальнага мемарыяльнага комплексу «Храм-помнік у гонар Усіх Святых і ў памяць аб ахвярах, якія паслужылі ў выратаванні Айчыны нашай». Яго Высокапраасвяшчэнству саслужылі: старшыня Сінадальнага аддзела Беларускай Праваслаўнай Царквы па супрацоўніцтве са свецкімі ўстановамі адукацыі, протаіерэй Фёдар Поўны і клірыкі храма. У пропаведзі перад прычасцю а. Фёдар Поўны распавёў пра лёсы шэрагу беларускіх святароў, якія пацярпелі ад рук фашысцкіх захопнікаў у гады Вялікай Айчыннай вайны. Сіламі Усіхсвяцкага прыхода з месцаў іх пахаванняў, месцазнаходжанне якіх вядомыя, была сабрана зямля і змешчана ў памятную капсулу для Крыпты Храма-помніка. Мітрапаліт Веніямін узначаліў памінальную літыю і звярнуўся да прысутных з архіпастырскім словам.
Даведачна:
У праваслаўных манастырах і храмах у Дзень Перамогі здзяйсняецца асаблівае штогадовае памінанне загінуўшых у гады Вялікай Айчыннай вайны. У дзень 80-годдзя Вялікай Перамогі ў храмах і манастырах Беларусі па благаславенні Патрыяршага экзарха ўсяе Беларусі прагучаў звон.
У гады Вялікай Айчыннай вайны Руская Праваслаўная Царква падзяліла з народам найцяжэйшыя выпрабаванні. Па ўсёй краіне ў храмах здзяйсняліся малебны аб дараванні перамогі. Яшчэ адным напрамкам патрыятычнай дзейнасці Рускай Праваслаўнай Царквы быў актыўны ўдзел ва Усесаюзным зборы сродкаў на патрэбы арміі, у дапамогу параненым байцам і іх сем'ям, на збудаванне танкавых калон і авіяэскадрылій. На грошы вернікаў былі абсталяваныя ў тым ліку танкавая калона імя Дзімітрыя Данскога і авіяцыйная эскадрылля імя Аляксандра Неўскага.
Святары дапамагалі параненым воінам і партызанам, хавалі іх, здабывалі найкаштоўнейшыя звесткі аб дыслакацыі нямецкіх войскаў, ратавалі яўрэйскіх дзяцей, выводзілі людзей з лагераў. Пра гэта распавядаецца ў кнізе «Воіны духу», прысвечанай служэнню і подзвігам святароў у гады Вялікай Айчыннай вайны, якая была прадстаўлена 7 мая ў Беларускім дзяржаўным музеі гісторыі Вялікай Айчыннай вайны. Выдавецкі праект падрыхтаваны Беларускай Праваслаўнай Царквой і Беларускім тэлеграфным агенцтвам. У кнігу ўключаны 12 гісторый пра беларускіх святароў і манахаў, якія абаранялі Радзіму ў гады Вялікай Айчыннай вайны, а пасля яе адраджалі краіну, будавалі храмы і ўмацоўвалі веру людзей у Бога.
Па матэрыялах https://www.patriarchia.ru/
